ꑋꈌꁏꇁꀐ
ꁱꊿ:ꀊꑞꈫꎆ
ꀘꊿ:ꐙꇖꑸꆀ
【ꋍ】
ꉪꏤꑳꅶꁉꁱꆈꄮꌋꋥꅉꇆꆉꑭ
ꌔꁮꆪꎍꅷꇁꀐꌠꃰꐎꆎꁧꐯꌐꊂ
ꑋꈌꁦꐂꇈꅂꌗꋏꅉꃅꇀꌦꃲ
ꀉꑳꀊꏀꆎꈨꑌ
ꄇꃅꄇꀋꉆꌦꇁꏭꐛ!
【ꑍ】
ꈍꄮꇈꉈꉌꃀꂿꃅꌗꇩꋍꁬꌡꅷꇁ
ꁨꏸꈄꀕꀵꌊꑭꉅꑲꅉꀋꃀꑟꁧꑲꆀꍑꑴꌦ
ꊨꃀꎳꁧꄌꌊꃄꐷꉻꈫꀉꆹꑟꁧꑲꆀꍑꑴꌦ
ꉱꈐꆸꄜꀉꂿꑽꇗꂂꅉꑌꄉꂂꀜꐈꌠ
ꋍꑠꉬꇮꎺꏣꐛꌦꉂꏣꐛꌦꃅꇁꑋꐥ
【ꌕ】
ꈍꃅꉪꑌꆎꆹꎆꂿꑓꁯꇕꂷꉬꏭꐛ
ꋋꆹꀋꉬꄷꆏ
ꑞꃅꎅꍈꆫꒉꄷꇬꑓꂭꋋꌦꇆ
ꉺꐚꁡꇤꑭꀵꆈꐷꀕꊂꆏ
ꆏꂾꑋꈌꐊꄉꉌꂵꁱꐛꌊꎆꊂꊼꇅꈹꅊꇈ
【ꇖ】
ꑋꈌꁏꇁꆫꄓꂾꄑꇬꊎꆏꃛꉢꀋꃛ
ꃛꇁꅉꇬꊽꉌꉪꐨꈍꑋꇫꐊꇁꀋꐚ
ꃛꇁꅉꇬꊽꉘꇉꐨꈍꑋꇫꅐꇁꀋꐚ
ꀃꑍꋋꄮꉢꑞꌌꑞꑵꃅꁧꂯ
ꑓꂭꊼꇅꋎꆏꑋꈌꑳꉎꆼꏦꃓꎻꑟ
【ꉬ】
ꐥꇁꍂꃅꈳꅐꁧꀋꄐꌠꃮꆫꐦꀞꇆ
ꉪꆹꀒꈓꊂꈎꄩꎆꄉꅿꌠꑋꈌꁬꌺꍈ
ꃮꅸꂷꏦꋍꑍꉪꄝꆘꅝꂿꀋꉂ
ꃮꃀꁓꋩꋍꑍꃣꁏꅅꀋꈨ
ꋋꑌꈬꏣꑳꏡꇬꄉꅐꂋꌠꉂꐪꉫꒉꄸ
【ꃘ】
ꂷꇫꇆ ꆏꂾꑋꈌꇁꄷꌦꆏꃴꂷꋝ
ꐩꇗꈴꌐꊂꆏꋍꍂꋍꃅꄚꄉꈤꑋꐥ
ꈍꄮꇈꉈꉏꆈꇽꃅꇽꅷꇁꌠꃅꈋꃰꊿꇆ
ꃆꃀꉐꂷꈍꑋꆍꌧꑋꈌꐊꄉꅾꌦꃧꌦꃅ
ꂷꉐꋍꄲꐛꆏꉌꃀꋍꄲꄚꐊꇿ
【ꏃ】
ꃮꃀꀉꆈꑳꂾꇁꄿꑸꑽꋌꌦꉗꌦꅩꐥꈿꌦꀐ
ꃷꇎꀋꃀꉘꁮꈨꑗꄏꌐꈤꂸꉆꌦꃲ
ꀉꑳꆿꌺꉌꃀꐒꏣꈤꂸꉆꌦꃲ
ꃮꃀꀉꆈꆎꂷꀋꇷꋠ
ꆺꑳꀉꂿꂷꏦꈍꑋꆿꌺꇁꉚꄉꀋꐚ
【ꉆ】
ꑋꈌꇁꌊꉪꏤꁡꇤꑟ
ꁡꇤꃷꇎꇵꂷꌊꄉꎧꏸꃅꄉꌞ
ꁡꇤꃷꇎꉂꏣꌊꄉꈁꁠꃅꄉꌞ
ꁡꇤꃷꇎꉌꃀꌊꄉꐝꍠꀕꃅꌞ
ꋌꃀꍍꃤꆀꃤꉬꇮꃅꆳꎮꈁꐛꆘꅝ
【ꈬ】
ꈍꄮꇈꉈꊽꈁꐛꑓꐛꅷꇁꌠꃅꈋꁯꆮ
ꆍꆹꑋꈌꊩꌺꉬꌠꉢꅉꀋꐚꈀꄸꇫꅉꐚ
ꑋꈌꈨꑭꊿꌶꁦꉘꀕꌄꌠ
ꒉꉘꉙꏂꅿꁮꋌꄖꀀꐚꇁꀋꐚ
ꒉꊩꁉꃶꐴꀕꋌꄖꀀꐚꇁꀋꐚ
……
【ꊰ】
ꉌꃀꄁꃰꏿꌠꀉꂿꌺꅪꈧꌠꇆ
ꑋꈌꁏꇁꄮꇬꆏꎺꅽꃅꆹꄀꀕ
ꅽꃅꀉꑳꆏꎺꀕ
ꀉꄉꀉꂿꆏꎺꀕ
ꏣꃀꏣꑟꆏꎺꀕ
【ꊯꊪ】
ꑋꈌꁏꇁꃲ
ꁏꌊꆍꏤꃅꈋꑟ
ꁏꌊꉪꏤꃅꈋꑟ
ꁏꌊꋀꏤꃅꈋꑟ
ꉡꆹꀅꌳꀕꃅꑭꁘꋍꁘꐕꏭꄐ
【ꊰꑋ】
ꑋꈌꁏꇁꀐ ꉠꃤꉬꄷꈧꌠꉬꇮꋌꁏꄚꐊꇁ
ꑋꈌꁏꇁꀐ ꅽꃤꉬꄷꈧꌠꉬꇮꋌꁏꄚꐊꇁ
ꑋꆳꆲꌙꀕꃅꁏꇁꄮ
ꉪꏤꁡꇤꋋꂷꉢꇫꉂꐯꇫꉂ
ꆎꒉꉢꐍꑌ ꉡꒉꆏꐍꑌ